வேலூர் மாவட்டம், காட்பாடி தாலுகாவுக்கு உட்பட்ட திருவலம் அருகே அமைந்துள்ள பிரசித்தி பெற்ற வள்ளி தெய்வானை சமேத சுப்பிரமணிய சுவாமி திருக்கோவிலில் ஆடி மாத கிருத்திகையை முன்னிட்டு சிறப்பு வழிபாடுகள் மற்றும் ஆன்மிக நிகழ்ச்சிகள் வெகுவிமரிசையாக நடைபெற்றன. அதிகாலை முதலே பக்தர்கள் திரளாகக் கூடிவந்து சுவாமி தரிசனம் செய்தனர்.
விழாவையொட்டி தேரடியில் அமைந்துள்ள ஸ்ரீ வரசித்தி விநாயகர் சன்னதியில் பால், தயிர், தேன், இளநீர் உள்ளிட்ட பல்வேறு திரவியங்களால் சிறப்பு அபிஷேகம் நடத்தப்பட்டு, சந்தனக் காப்பு அலங்காரத்துடன் மகா தீபாராதனை நடைபெற்றது. தொடர்ந்து மலைக்கோவிலின் நடை திறக்கப்பட்டு, மூலவர்களான வள்ளி–தெய்வானை சமேத சுப்பிரமணிய சுவாமிக்கு விசேஷ அபிஷேகங்கள் செய்யப்பட்டு, தங்கக் கவசம் அணிவிக்கப்பட்டு பக்தர்களுக்கு அருள்பாலிக்கப்பட்டது.
மலை அடிவாரத்தில் தனிச் சன்னதியில் எழுந்தருளியுள்ள வள்ளியம்மனுக்கும் சிறப்பு அபிஷேகம், தங்கக் கவச அலங்காரம், மலர் அலங்காரம் செய்யப்பட்டு மகா தீபாராதனை காண்பிக்கப்பட்டது. மேலும் கீழ்க்கோவிலில் உள்ள வள்ளி–தெய்வானை சமேத ஆறுமுகசாமிக்கு வெள்ளிக் கவசம் அணிவித்து, சந்தனக் காப்பு மற்றும் மலர் அலங்காரத்துடன் சிறப்பு பூஜைகள் நடைபெற்றன. பின்னர் அதிகாலை முதலே பக்தர்கள் சுவாமி தரிசனம் செய்ய அனுமதிக்கப்பட்டனர்.
பக்தர்கள் மலை அடிவாரத்தில் உள்ள சரவணப் பொய்கையில் புனித நீராடி, பால் காவடி, பன்னீர் காவடி, புஷ்ப காவடி, மயில் காவடி உள்ளிட்ட பல்வேறு காவடிகளை சுமந்து “அரோகரா” என பக்தி முழக்கமிட்டபடி மலை உச்சியில் உள்ள முருகப்பெருமானை தரிசித்து நேர்த்திக்கடனை நிறைவேற்றினர். வேலூர், ராணிப்பேட்டை, திருப்பத்தூர் மாவட்டங்களுடன் ஆந்திரப் பிரதேசம், கர்நாடகா உள்ளிட்ட அண்டை மாநிலங்களிலிருந்தும் ஏராளமான பக்தர்கள் திரளாகக் கலந்து கொண்டு ஆடி கிருத்திகை விழாவை பக்தி பரவசத்துடன் கொண்டாடினர். விழாவை முன்னிட்டு கோவில் நிர்வாகம் பக்தர்களுக்கான தேவையான வசதிகளையும் சிறப்பாக ஏற்பாடு செய்திருந்தது.
