துணைநிலை ஆளுநர் கைலாசநாதன், முதலமைச்சர் ரங்கசாமி உள்பட பல்லாயிரக்கணக்கானோர் கலந்துகொண்டு தேரை வடம்பிடித்து இழுத்தனர்.
வரலாற்றுச் சிறப்புமிக்க திருக்காமீசுவரர் கோவிலில் நடைபெற்று வரும் வைகாசி திருவிழாவின் முக்கிய நிகழ்வான திருத்தேர் உலா இன்று வெகு விமர்சையாக நடைபெற்றது. வில்லியனூரில் அமைந்துள்ள இந்த புராதனக் கோவில் சுமார் ஆயிரம் ஆண்டுகள் பழமையானது. தர்மபால சோழ மன்னரால் கட்டப்பட்ட இக்கோவில், புதுச்சேரியின் முக்கிய சிவாலயங்களில் ஒன்றாகவும், பக்தர்கள் நெருக்கமான தலமாகவும் திகழ்கிறது. ஆண்டுதோறும் வைகாசி மாதத்தில் சிறப்பாகக் கொண்டாடப்படும் இந்தத் திருவிழா, இந்த ஆண்டும் கொடியேற்றத்துடன் கோலாகலமாகத் தொடங்கியது.
விழாவின் உச்சக்கட்டமாக இன்று திருத்தேர் பவனி நடைபெற்றது. கோவில் வாசலில் நடைபெற்ற இந்நிகழ்ச்சியில், புதுச்சேரி துணைநிலை ஆளுநர் கைலாஷ்நாதன் மற்றும் முதலமைச்சர் என். ரங்கசாமி ஆகியோர் தேரை வடம் பிடித்து இழுத்து விழாவை தொடங்கி வைத்தனர். இவர்களுடன் அமைச்சர் நமச்சிவாயம், சட்டமன்ற உறுப்பினர் ரவிக்குமார் உள்ளிட்ட பல முக்கிய பிரமுகர்களும் கலந்துகொண்டனர். கிழக்கு மாட வீதியில் தொடங்கிய பிரம்மாண்டமான திருத்தேர், வடக்கு, மேற்கு, தெற்கு மாட வீதிகள் வழியாகச் சென்று மீண்டும் கோவில் நிலையை அடைந்தது.
தேர் உலாவின் போது வில்லியனூர் மற்றும் அதைச் சுற்றியுள்ள கிராமங்களைச் சேர்ந்த ஆயிரக்கணக்கான பக்தர்கள் உற்சாகத்துடன் கலந்துகொண்டனர். பலர் தேரை வடம் பிடித்து இழுத்தபடி, சுவாமி தரிசனம் செய்து பக்திப் பரவசத்தை வெளிப்படுத்தினர். தெருக்கள் முழுவதும் பக்தர்கள் கூட்டம் நிறைந்திருந்தது. மங்கள வாத்தியங்கள், ஒலி பெருக்கிகளில் ஒலித்த பக்தி பாடல்கள் மற்றும் தீப அலங்காரங்கள் ஆகியவை திருவிழாவுக்கு மேலும் சிறப்பு சேர்த்தன.
திருக்காமீசுவரர் கோவில் தொன்மை மிக்க சிற்பக்கலை அம்சங்களுடன் கூடியது. சோழர் காலக் கட்டிடக்கலைக்கு சான்றாக விளங்கும் இக்கோவில், பக்தர்களை ஈர்க்கும் அழகிய கோபுரம் மற்றும் சன்னதிகளுக்கு பெயர் பெற்றது. வைகாசி திருவிழா கோவிலின் வரலாற்றுப் பெருமையை மீண்டும் நினைவூட்டும் வகையில் ஆண்டுதோறும் நடைபெறுவது குறிப்பிடத்தக்கது. இந்த ஆண்டு விழாவில் பாதுகாப்பு ஏற்பாடுகள் முழுமையாக செய்யப்பட்டிருந்தன. போலீஸ், தீயணைப்பு மற்றும் மருத்துவக் குழுக்கள் தயார் நிலையில் இருந்தன. பக்தர்கள் அனைவரும் பக்திப் பெருக்குடன் தேரோட்டத்தை கண்டு மகிழ்ந்தனர். திருவிழா இன்னும் சில நாட்கள் தொடரும் என எதிர்பார்க்கப்படுகிறது.
