ஆடி மாதத்தின் முதல் நாளும், முதல் ஆடி வெள்ளிக்கிழமையும் இணைந்து வந்ததை முன்னிட்டு, தேனி அருகே உள்ள பிரசித்தி பெற்ற அருள்மிகு ஸ்ரீ வீரபாண்டி கௌமாரியம்மன் திருக்கோயிலில் வெகுவிமர்சையாக சிறப்பு வழிபாடுகள் நடைபெற்றன. அதிகாலை முதலே ஆயிரக்கணக்கான பக்தர்கள் கோயிலுக்கு திரண்டு வந்து அம்மனை தரிசனம் செய்தனர்.
தேனி மாவட்டத்தின் பல்வேறு பகுதிகள் மட்டுமின்றி, அண்டை மாவட்டங்களிலிருந்தும் ஏராளமான பெண்கள், குடும்பத்தினருடன் கோயிலுக்கு வருகை தந்து சிறப்பு பூஜைகளில் பங்கேற்றனர். ஆடி மாதம் முழுவதும் விரதம் மேற்கொள்ள உள்ள பக்தர்கள், கோயில் வளாகத்தில் காப்புக் கட்டி தங்களது விரதத்தை பக்தி உணர்வுடன் தொடங்கினர்.
இதையொட்டி, மூலவர் மற்றும் உற்சவர் கௌமாரியம்மனுக்கு வண்ணப் பட்டு ஆடைகளால் சிறப்பு அலங்காரம் செய்யப்பட்டு, மலர் அலங்காரத்துடன் பக்தர்களுக்கு அருள்பாலித்தார். நீண்ட வரிசையில் காத்திருந்த பக்தர்கள் அம்மனை தரிசித்து வழிபட்டனர்.
ஆடி மாதத்தின் முதல் வெள்ளிக்கிழமை என்பதால், கோயில் வளாகம் முழுவதும் பக்தர்கள் கூட்டம் அலைமோதியது. பக்தர்களின் வசதிக்காக கோயில் நிர்வாகம் சிறப்பு ஏற்பாடுகளை செய்திருந்தது. பாதுகாப்பு பணிக்காக காவல்துறையினரும், கோயில் ஊழியர்களும் கண்காணிப்பு பணியில் ஈடுபட்டனர்.
மேலும், ஆடி மாதத்தை முன்னிட்டு கோயில் முன்பாக பக்தர்கள் சார்பில் பாரம்பரிய முறையில் கூழ் காய்ச்சி, அன்னதானமாக பக்தர்களுக்கு வழங்கப்பட்டது. பக்தர்கள் ஆர்வத்துடன் கூழைப் பெற்று அருந்தி, அம்மனின் அருளைப் பெற்றுச் சென்றனர்.
ஆடி மாதத்தின் தொடக்க நாளில் நடைபெற்ற இந்த சிறப்பு வழிபாடு, பக்தர்களிடையே ஆன்மிக உற்சாகத்தை ஏற்படுத்தியது.
